Janë 5 vendime që duhen marrë rreth atyre që quhen 5 M-të e reklamimit: misioni, mesazhi, media, monedha (money), matja. Le t’i shohim më poshtë:
Misioni mund të jetë: informues, bindës, kujtues apo përforcues. Me një produkt të ri, kompania normalisht duhet të informojë dhe/ose të bindë. Me një produkt të vjetër, si Coca Cola, kompanisë i duhet të kujtojë. Me produkte të tjera që kanë nisur të shiten, duhet të sigurohen blerësit që kanë bërë një blerje të mirë, me anë të një reklame përforcuese.
Mesazhi duhet të komunikojë vlerën e dallueshme të markës përmes fjalëve dhe imazheve. Disa pyetje që duhet t’i përgjigjemi rreth mesazhit, janë:
- Cili është mesazhi kryesor që merret nga reklama?
- Çfarë kërkojmë ne që audienca të dijë, bëjë apo të besojë?
- Sa e mundur është që reklama të influencojë audiencën për marrjen e një vendimi?
- Cilat janë pikat e forta dhe të dobta të reklamës?
- Si do ndjehet audienca që ndjek reklamën?
- Cili është vendi/ambjenti i duhur për shfaqjen e reklamës?
Media ku do të reklamohet, duhet zgjedhur sipas aftësisë së saj për të arritur audiencën tonë të targetuar, me një efiçencë sa më të lartë. Tashmë gradualisht vendin e mediave tradicionale si gazetat, revistat, radio, TV dhe billboardet, po e zënë mediat të reja online, përfshirë rrjetet sociale, emailet, gazetat dhe revistat online, reklamimin në pikën e shitjes apo edhe reklama në ashensorë, tavolina lokali, etj. Me gjithë këto mundësi, zgjedhja e medias së duhur është bërë një sfidë madhore. Shpesh, duhen bërë kompromise midis shikueshmërisë, impaktit të medias dhe buxhetit.
Monedha (money) siç e pamë më lart përdoret për të paguar median në të cilën shfaqet reklama jonë. Por paratë janë të rëndësishme edhe për prodhimin e reklamës dhe të kostove të tjera. Prodhimi i reklamës mund të bëhet brenda për brenda kompanisë, por edhe duke nënkontraktuar një firmë të specializuar reklamimi. Në rastin e dytë, pagesa e asaj firme këshillohet të bëhet mbi bazën e “pagesës sipas performancës”. Kjo do të ishte e logjikshme, sepse një reklamë që nuk rrit shitjet e kompanisë, me shumë mundësi nuk është realizuar si duhet (duke mos marrë parasysh faktorë të tjerë që ndikojnë tek shitjet – dhe firma reklamuese do të thotë që faktorët e tjerë kanë ndikuar dhe jo reklama e prodhuar prej tyre). Pra, kjo nuk do të thotë që nëse shitjet nuk ecin mirë firma që prodhon reklamën të mos paguhet fare, por pagesa duhet të variojë me përqindje. Pak kompani kreative reklamash janë të gatshme të pranojnë një sfidë të tillë, por nëse nuk kanë besim ata tek vetja, pse duhet të keni ju?
Matja është një element i rëndësishëm e gjithë procesit për të parë rezultatet e një fushate. Jo vetëm për të kuptuar sa % e audiencës së synuar e kanë parë realisht reklamën po për më tepër është mjaft e vështirë për të matur saktësisht ndikimin e një reklame tek perceptimi i audiencës për produktin tonë apo tek ecuria e shitjeve. Për shembull, si mundet Coca-Cola të masë ndikimin e një reklame të saj në formë fotoje të një kanaçeje në kopertinën e pasme të një reviste, në të cilën kompania ka shpenzuar 70,000 dollarë? Nëse një kanaçe kushton 70 cent dhe fitimi i kompanisë është 10 cent për copë, atëherë ndikimi i asaj reklame duhet të sjellë shitjen e 700,000 kanaçeve plus për kompaninë! Nëse bëjmë llogari të tilla, mund të kuptojmë që shumë reklama nuk arrijnë ta mbulojnë koston e tyre, por megjithatë kompanitë duhet të përpiqen të bëjnë matjet e tyre, nëpërmjet anketave, krahasimit të ecurisë së shitjeve. Në rastin e mediave online, disa gjëra janë të matshme më lehtësisht si numri i shfaqjeve, sa vizitorë e kanë parë, sa prej tyre e kanë klikuar, sa prej tyre janë shndërruar në blerës. Kjo pjesë është gjithashtu një avantazh i mediave online.
Sa duhet të shpenzojmë për reklama? Nëse shpenzojmë shumë pak, atëherë jemi duke shpenzuar shumë, pasi askush nuk do e vërë re reklamën. 1,000 euro reklamë televizive, vështirë se do të vihet re. Nga ana tjetër nëse shpenzojmë shumë, fitimet do të vuajnë. Kjo është puna e atyre që punojnë me reklamat. Të gjejnë ekzaktësisht të mesmen e artë, ku fitimet mbahen brenda objektivave, ndërkohë që mesazhi i reklamës përcillet siç duhet.
Por nëse kompania shpenzon shumë para për reklamim dhe anashkalon elementët e tjerë të marketingut, atëherë sigurisht që reklamimi do të ishte një investim i gabuar. Departamenti i marketingut duhet të bëjë kujdes po aq sa me reklamimin edhe për imazhin e markës, paketimin, krijimin e një produkti që i përshtatet targetgrupit, publicitetin pozitiv, marrëdhëniet publike, shërbimin dhe trajtimin e klientëve, përfshirë këtu mënyrën se si flisni në telefon dhe se si i buzëqeshni atyre.
