Statistikat e reklamave që bizneset bëjnë në rrjetet sociale, kanë ndryshuar mënyrën se si matet kthimi i investimeve në marketing. Nësë për reklamat në banera, tv apo radio, nuk ka asnjë statistikë të qartë se sa persona e kanë parë atë reklamë, në rastin e reklamave online, këto shifra janë të sakta.
Por shumë biznese fokusohen në të dhënat e gabuara. Dhe ky fokus i gabuar është reach, pra sa personave i është shfaqur ajo reklamë. Për shembull, ata vlerësojnë si të suksesshme një fushatë për të cilën janë shpenzuar 1000 euro dhe ka arritur tek 500.000 njerëz, ndërsa më pak të suksesshme një reklamë që për 500 euro ka arritur tek 100.000 njerëz.
Por ka tre gjëra më të rëndësishme sesa reach-i.
E para: Sa prej këtyre njerëzve janë pjesë e audiencës target të biznesit.
Nëse nga 500.000, target janë 10%, ndërsa nga 100.000 target jane 50%, atëherë në këtë këndvështrim, kjo e fundit është më e vlefshme, edhe pse ka një cpm më të lartë.
E dyta: Nëse mesazhi që këta njerëz kanë parë, është i duhuri.
Kjo është pikë më e rëndësishme sesa e para, sepse edhe sikur këta 500.000 njerëz që shohin reklamën, të jenë të gjithë klientë potencial, nëse reklama është thjesht interesante dhe merr reach të mirë, por nuk jep mesazhin e duhur, atëherë e gjithë puna shkon dëm. Çfarë është mesazhi i duhur? Ai që përmbush objektivin e fushatës. Ky objektiv zakonisht është rritja e shitjeve, por mund të jetë edhe fushatë për përmirësimin e imazhit të markës.
E treta: Nëse produkti/shërbimi përmbush pritshmëritë.
Kjo është më e rëndësishmja nga të gjitha, të paktën për bizneset që supozohet të jenë afatgjata. Shkurt, nuk duhet të gënjehet në reklamë dhe as të reklamohet nëse nuk jeni gati. Nëse premton diçka, duhet ta mbash. Pavarësisht nëse është një karakteristikë e produktit, mënyrën e përdorimit, cilësi apo shpejtësi në shërbim, etj. Vetëm duke kënaqur pritshmëritë e klientëve, apo edhe më mirë tejkaluar ato, biznesi bën përpara. Me një shpenzim reklame prej 1000 euro, janë më mirë 100 klientë të kënaqur, sesa 10.000 të pakënaqur.
